स्मार्ट टीव्ही आणि सायबर सिक्युरिटी

 

 

 

..........................................................

 

स्मार्ट टीव्ही हा एक डिजिटल टेलिव्हिजन आहे. जो मूलत: इंटरनेटशी कनेक्ट केलेला, मनोरंजनासाठी खास स्टोरेज असलेला संगणक आहे. स्मार्ट टीव्ही स्टँड-अलोन उत्पादने म्हणून उपलब्ध आहेत, परंतु प्रगत कार्ये सक्षम करणार्‍या सेट-टॉप बॉक्सद्वारे नियमित टेलिव्हिजन देखील “स्मार्ट” करता येतात.

 

जेव्हा स्मार्ट टीव्ही बाजारात उपलब्ध झाले, तेव्हा असे टीव्ही खरेदी करणारे एक तर फक्त उच्च मध्यमवर्गीय तसेच श्रीमंत लोक होते. कारण तेव्हा ह्या स्मार्ट टीव्हीच्या किमती सर्वसामान्य लोकांना परवडणाऱ्या नव्हत्या. आता बाजारातील स्पर्धेत टिकून राहण्यासाठी प्रत्येक टीव्ही कंपनीने बाजारात स्मार्ट टीव्ही उपलब्ध केले आणि तेदेखील सर्वसामान्यांना परवडतील अशा किमतीत. 

 

स्मार्ट टीव्हीचा मुख्य फायदा म्हणजे, टीव्ही अँटेना न जोडता शिवाय केबल/उपग्रह सेवेची सदस्यता घेतल्याशिवाय टीव्ही कार्यक्रम, चित्रपट आणि संगीत या सेवा देऊ करणार्‍या वाहिन्यांमध्ये प्रवेश करता येतो. तसेच, काही स्मार्ट टीव्ही वेब ब्राउझिंग, गेमिंग आणि आपल्या संगणकावर संचयित सुसंगत माध्यम सामग्रीमध्ये प्रवेश करू शकतात. 

 

१) गोपनीयता समस्या आणि 

२) सुरक्षितता समस्या 

 

गोपनीयता प्रकरणांमध्ये आपल्या सवयींचे परीक्षण केले जाणे आणि आपला वैयक्तिक डेटा विकणे यांसारख्या गोष्टींचा समावेश आहे, तर सुरक्षिततेच्या समस्येमध्ये व्हायरस आणि हॅकर्सचा समावेश आहे. स्मार्ट टीव्हीमध्ये सुरक्षिततेच्या कारणांशी निगडित प्रायव्हसी मुद्द्यांमुळे लोकांना बर्‍याच वेळा आश्चर्य वाटते.

 

बर्‍याच स्मार्ट टीव्हींमध्ये पर्याय शोधण्यासाठी आणि नियंत्रित करण्यासाठी व्हॉईस पर्याय, शिवाय व्हिडिओ चॅट आणि गेम्ससाठी कॅमेरे आहेत. हे पर्याय टीव्ही वापरण्यासाठी मजेदार आणि नवीन मार्ग उपलब्ध करतात, परंतु त्याचप्रमाणे असुरक्षिततेची दारेही उघडतात. स्मार्ट टीव्हीमध्ये अॅन्ड्रॉईड ऑपरेटिंग सिस्टीम वापरली जाते. स्मार्ट टीव्ही इंटरनेटला जोडलेला असल्यामुळे आक्रमणकर्ता/हॅकर टीव्हीच्या ऑपरेटिंग सिस्टीममधील दोष शोधून त्याचा ताबा मिळवतात व त्याचा दुरुपयोग करतात. स्मार्ट टीव्हीचा ताबा चुकीच्या हातात गेल्यामुळे, आपल्या स्मार्ट टीव्हीवरील मायक्रोफोन आणि वेब कॅमेरा पाळत ठेवणे डिव्हाइसमध्ये रुपांतरीत केले जाऊ शकते. उदाहरणार्थ, विकीलीक्सच्या मते, सीआयएने "वीपिंग एंजल" नावाचे एक साधन तयार केले आहे, जे काही स्मार्ट टीव्ही मायक्रोफोन एका दूरस्थ ऐकण्याच्या डिव्हाइसमध्ये बदलू शकते. त्याचप्रकारे आपल्यावर नजर ठेवण्यासाठी आक्रमणकर्ता आपल्या वेब कॅममध्ये प्रवेश करण्यास सक्षम होऊ शकेल.

 

जुलै २०१९मध्ये घडलेल्या घटनेत स्मार्ट टीव्हीमधील दोषांचा दुरुपयोग करून एका जोडप्याच्या नकळत त्यांचे खाजगी आयुष्यातील क्षणांचे चित्रण करून ते सोशल मिडीयावर प्रसिद्ध केले. या घटनेचा जेव्हा तपास करण्यात आला, तेव्हा झालेले चित्रण त्याच व्यक्तीच्या बेडरूममधील स्मार्ट टीव्हीमधील दोषांचा दुरुपयोग करून आक्रमणकर्त्याने/हॅकरने केले होते, असे लक्षात आले.